Cwpan Her Penfro – Myrddin 2018

Mae cwpan her Penfro – Myrddin yn gystadleuaeth flynyddol rhwng buddugwyr cystadlaethau pêl droed Ysgolion Sul a chlybiau Cristnogol sir Benfro a drefnir gan bwyllgor Yr Egin Gwyrdd, ac Ysgolion Sul a chlybiau Cristnogol sir Gaerfyrddin a drefnir gan M.I.C. Eleni, y timoedd o sir Gaerfyrddin oedd gartref a chynhaliwyd y gemau yng Nghanolfan Hamdden Caerfyrddin. Yn cynrychioli sir Benfro yn yr oed cynradd oedd tîm cylch Carn Ingli, ac yn cynrychioli sir Gâr oedd tîm a ffurfiwyd ar y cyd rhwng Capel Newydd Llanddarog a Providence, Llangadog. Cymerodd y tîm cartref afael yn y chwarae o’r dechrau gan sgorio goliau cynnar cyn mynd ymlaen i ennill yn gyffyrddus o 8-1.

Yn syth ar ôl y gystadleuaeth gynradd daeth y bechgyn hŷn i’r maes. Yn cynrychioli sir Benfro oedd tîm eglwys Casblaidd ac yn cynrychioli sir Gaerfyrddin oedd tîm a ffurfiwyd ar y cyd rhwng Tabernacl Hendy Gwyn Ar Daf a Bethlehem, Pwll Trap. Fel y disgwyl, cafwyd cystadleuaeth frwd gyda’r tîm o sir Gâr yn mynd ar y blaen yn gynnar gan sgorio 3 gôl cyn i dîm Casblaidd i daro nôl i wneud y sgôr yn 3-1. Ond cyn hir fe aeth y tîm cartref ymhellach ar y blaen gan ennill y gêm o 5-1. Dyma’r ail dro yn olynol i dîm Tabernacl, Hendy gwyn a Bethlehem, Pwll Trap i ennill y gystadleuaeth hon.

Cyflwynwyd y cwpanau gan Bonni Davies (ysgrifenyddes) a’r Parchg. Eirian Wyn Lewis (cadeirydd) o bwyllgor Yr Egin Gwyrdd sir Benfro, ac am eleni bydd y ddau gwpan her yn aros yn sir Gâr.

Isod mae lluniau o’r timoedd. Cliciwch ar lun, ac yna ar ôl ei agor cliciwch arno eto er mwyn chwyddo ei faint.